Зимските олимписки игри во Милано и Кортина, кои се отвораат вечерва, ќе бидат најраштрканите во олимписката историја. Поради одлуката на организаторите да користат веќе постоечка инфраструктура што е можно повеќе, Игрите нема да имаат едно централно место, туку ќе се протегаат на 22.000 квадратни километри.

Во следните 16 дена, околу 2.900 спортисти од повеќе од 90 држави ќе се натпреваруваат на снег и мраз.

На посетителите на ЗОИ ќе им биде исклучително тешко да гледаат спортови на мраз во Милано, машко алпско скијање во Бормио, сноубординг во Ливињо, скијачко трчање во Предацо, биатлон во Антерселва и женско скијање во Кортина, пред да одат на церемонијата на затворањето во Верона на 22 февруари. Тоа е патека од околу 850 километри, за што се потребни 13 часа непрекинато возење.

Во Кортина ќе се возат трките од женското алпско скијање (Фото: Гети)

Ширењето на Игрите го намали бројот на нови структури и им овозможи на повеќе области во северна Италија да имаат корист од инвестициите и туризмот што доаѓаат со вакви големи настани. Но, тоа исто така ги лишува Игрите од еден емотивен центар, па гледачите ќе мора да донесат тешки одлуки на кои настани да присуствуваат, а спортистите ќе имаат тешкотии да ги бодрат своите сонародници.

Ова е прва олимпијада со два центра, две церемонии на отворање и со настани групирани во четири области. Организаторите мораа да најдат сместување не само во Милано и Кортина, туку и на четири други локации: Антерселва во близина на австриската граница, Бормио и Ливињо близу швајцарската граница и Вал ди Фиеме во автономната покраина Трентино.

По Игрите, Олимпиското село во Милано ќе стане дом за 1.700 ученици, а во Кортина е изградено привремено село.