„Една битка по друга“ е прогласен за најдобар филм на 98. Оскари, крунисувајќи ја кариерата на Пол Томас Андерсон, еден од најзначајните современи филмаџии, кој по 14 номинации ги освои своите први три оскари. Андерсон беше награден како продуцент, режисер и сценарист на филмот, кој се закити со вкупно шест статуетки, две повеќе од блузерскиот хорор „Грешници“.
„Го напишав овој филм за моите деца да се извинат за нередот што го оставивме на овој свет – им го предаваме на нив. Се надевам дека тие ќе бидат генерацијата која ќе донесе малку здрав разум и пристојност. Нашиот филм очигледно има одредена паралела со она што се случува во вестите секој ден и го одразува она што се случува во светот во однос на тоа каде оди“, рече тој како да алудира на поделената политичка клима во САД и антиимиграциските чувства.
Шон Пен стана само четврти актер кој освоил три оскари, овојпат за најдобра машка споредна улога во „Една битка по друга“, а овој филм славеше и во новата категорија најдобар кастинг. Пен не дојде на оскаровската церемонија.
Најдобрите актери за 2025, Џеси Бакли и Мајкл Б. Џордан (Фото: АП)
„Грешници“, кој имаше рекордни 16 номинации, го донесе можеби најголемото изненадување на вечерта, откако Мајкл Б. Џордан го победи Тимоти Шаламе за Оскарот за најдобар актер. Неговиот режисер Рајан Куглер беше награден за најдобро оригинално сценарио, а Отум Дуралд Аркапау стана првата жена која добила Оскар за најдобра кинематографија. Четвртиот Оскар за „Грешници“ е за најдобра музика (Лудвиг Јерансон).
„Татко ми дојде дури од Гана за да биде тука, целото семејство е тука. Татко ми секогаш ми велеше, не очекувај ништо да ти биде дадено, работи си, знаејќи дека сè друго ќе се среди само од себе“, рече Џордан.
Џеси Бакли беше јасна фаворитка за Оскарот за најдобра актерка за „Хамнет“ и сега ја заокружи богатата жетва награди оваа сезона, а хорор жанрот доби уште едно големо признание кога Ејми Мадиган ја доби наградата за најдобра женска споредна улога за „Оружја“. Тоа беше нејзина прва номинација по 40 години пауза.
„Сентиментална вредност“ на Јоаким Трир е првиот норвешки филм кој се закитил со Оскар за најдобар странски филм, „Франкенштајн“ на Гилјермо дел Торо доби три награди (сценографија, шминка/фризура и костимографија), а „К-поп ловци на демони“ две (најдобар анимиран филм и најдобра оригинална песна).
Оскар за најдобар документарец освои „Господин Никој против Путин“ на Дејвид Боренштајн и корежија на Павел „Паша“ Таланкин, филм за руски наставник во основно училиште кој ја документира индоктринацијата на ученици за да ја поддржат војната на Русија со Украина.
„’Господин Никој против Путин’ е за тоа како ја губите вашата земја. А она што го видовме кога работевме со овој материјал е дека ја губите преку безброј, мали, мали акти на соучесништво. Сите се соочуваме со морален избор, но, за среќа, никој не е помоќен отколку што мислите“, рече корежисерот Боренштајн.
