Иранскиот претседател Масуд Пезешкијан денеска се закани со остра одмазда против соседните земји ако бидат нападнати иранската инфраструктура или економските центри. Во пораката „до земјите од регионот“ објавена на Икс, Пезешкијан напиша: „Ако сакате развој и безбедност, не дозволувајте нашите непријатели да ја водат војната од вашите земји“.

Според ирански извори, израелските и американските сили претходно ги проширија своите воздушни напади врз челичарниците и објектите за одбранбена и енергетска инфраструктура во неколку ирански провинции. Од почетокот на војната на 28 февруари, Иран, пак, нападна цели во неколку земји од Персискиот Залив каде што се сместени американски воени бази.

Во меѓувреме, израелската армија соопшти дека завршила уште еден бран напади врз цели во Техеран поврзани со иранското раководство. Првично не беа достапни детали во врска со точните цели или можните последици. Извештаи за нови ирански ракетни напади имаше и во Израел, а сирените се огласија во неколку области на југот од земјата.