Доналд Трамп се закани дека американските сили ќе ги засилат нападите врз иранската инфраструктура, додека американските експерти предупредуваат дека САД можеби извршиле воени злосторства во Иран. Трамп ја заостри својата реторика во изминатите денови откако непосредните преговори со новите лидери во Иран покажаа малку знаци на напредок.

„Американската војска сѐ уште не почнала да го уништува она што останало од Иран. Следни се мостови, потоа електрани. Иранското раководство знае што треба да се направи и тоа мора да се направи брзо“, напиша Трамп на својата социјална мрежа.

Тој претходно објави видео од бомбардирањето на новоизграден мост меѓу Техеран и Караџ. Мостот „Б1“ требаше да се отвори за сообраќај оваа година. Според иранските медиуми, осум лица загинале во нападот врз Караџ.

„Напаѓањето на цивилни структури, вклучувајќи недовршени мостови, нема да ги принуди Иранците да се предадат“, порача иранскиот министер за надворешни работи Абас Арагчи.

Над 100 американски експерти по меѓународно право вчера кажаа дека однесувањето на американските сили и изјавите на високи американски претставници „покренуваат сериозна загриженост за кршење на меѓународното право за човекови права и меѓународното хуманитарно право, вклучително и потенцијални воени злосторства“. Во писмото потпишано од експертите особено се истакнува коментарот на Трамп од средината на март, кога тој вели дека САД можат да извршат напади врз Иран само за забава.

Во своето вчерашно ТВ-обраќање Трамп повторно се закани со напади врз иранските електрани и не понуди јасен временски рок кога војната би можела да заврши, најавувајќи жестоки удари врз Иран во следните две-три недели.