Експлозив со голема разорна моќ е пронајден во близина на гасоводот Турски тек во Србија, преку кој се транспортира руски природен гас до Унгарија и други европски земји, објави српскиот претседател Александар Вучиќ. Потоа тој имашет телефонски разговор со унгарскиот премиер Виктор Орбан за безбедносната состојба.

Вучиќ во објава на социјалните мрежи соопшти дека српските единици откриле опасна направа и дека веднаш го известил унгарскиот премиер Виктор Орбан за ситуацијата. Вучиќ рече дека истрагата е во тек и дека редовно ќе ја информира Будимпешта за сите нови сознанија од теренот.

По добиените информации од Србија, Орбан свика итен состанок на Советот за одбрана. Овој инцидент се случува во исклучително чувствителен период за Унгарија, на само една недела пред парламентарните избори закажани за 12 април. Партијата на Орбан, Фидес, која е на власт повеќе од 16 години, во моментов се соочува со силна конкуренција од опозициската партија Тиса, која води во дел од анкетите.

Унгарскиот премиер уште во февруари го зголеми нивото на безбедност околу клучната енергетска инфраструктура во земјата. Во текот на изборната кампања, тој често изјавува дека граѓаните избираат меѓу „војна и мир“, притоа обидувајќи се да го поврзе опозицискиот лидер Петер Маѓар со политиките на Брисел и Украина.

Дополнително, Унгарија е во постојан спор со Украина поради прекинот на испораката на нафта преку гасоводот Дружба. Најновиот настан со пронајдениот експлозив кај Турски тек, кој е витален за снабдувањето на регионот со гас, дополнително ги зголемува тензиите околу енергетската сигурност во овој дел од Европа.