Африка Бамбата, еден од пионерите на хип-хоп културата, почина од рак на 68 години во Пенсилванија, објави организацијата „Хип-хоп алијанса“.

Роден како Ленс Тејлор во Бронкс, Њујорк, Бамбата пораснал во ерата на движењето за ослободување на црнците. Како тинејџер бил член на улична банда, а во 1973 година ја основал групата „Јуниверзал Зулу нејшн“, чија цел била подигнување на свеста за хип-хопот и насочување на младите кон културата.

Неговиот хит „Planet Rock“ од 1982 му донесе светско признание и помогна во обликувањето на хип-хопот во 1980-тите.

„Неговата визија за хип-хопот го трансформираше округот Бронкс во родно место на култура која сега допира до секој агол од светот“, рече Кертис Блоу Вокер, извршен директор на „Хип-хоп алијанса“.

Во 1980-тите и понатаму, тој продолжи да соработува со бројни музичари, меѓу кои Џејмс Браун и Џон Лајдон и придонесе во политички освестени проекти, како што е песната против апартхејдот „Sun City“ од 1985 година.

Бамбата ја водеше „Јуниверзал Зулу нејшн“ до 2016 година, кога се повлече откако се појавија обвинувања за сексуална злоупотреба во 1980-тите и 1990-тите. Тој ги негираше овие обвинувања, но „Хип-хоп алијанса“ призна дека ова го комплицира неговото музичко наследство.