Завиткана во крвави завои, седумгодишната Алин Саид едвај го преживеа израелскиот напад врз нејзиниот дом во јужен Либан минатата недела. Таа беше таму за да го погреба својот татко додека надежите за примирје се ширеа низ регионот, но нов напад ја уби нејзината двегодишна сестра и други роднини.
Нападот врз семејниот дом на Саид во селото Шрифа се случи на 8 април, првиот ден од прекинот на огнот меѓу САД и Иран, за кој многумина во Либан се надеваа дека ќе се примени и во нивната земја. Наместо тоа, израелските напади убија повеќе од 350 луѓе низ Либан, а семејството Саид остана со уште четири роднини за погребување.
„Рекоа дека е прекин на огнот. Како и сите овие луѓе, отидовме во селото. Отидовме до ковчегот за да ги прочитаме молитвите и да одиме дома… одеднаш почувствувавме како бура да се спушта директно врз нас“, рече Насер Саид, 64-годишниот дедо на Алин, кој исто така преживеа.
Денеска, тој им се придружи на другите роднини во јужниот пристанишен град Тир за да ги соберат телата завиткани во зелена ткаенина. Во едно од нив, малку помало од останатите,беше неговата внука Талин, сестра на Алина, која сè уште немаше наполнето две години. Со завои на главата и десната рака и гребнатини на лицето, Саид тагуваше во тишина додека жените околу него ги свртија лицата кон небото и врескаа од агонија.
Последната војна во Либан започна на 2 март, кога либанската вооружена група Хезболах пукаше врз израелските позиции за поддршка на својот патрон Иран. Израел оттогаш ја засили својата воздушна и копнена кампања во земјата каде што во неговите операции загинаа повеќе од 2.000 луѓе, од кои 165 деца и речиси 250 жени. Папата Лав денеска изјави дека се чувствува блиску до „саканиот либански народ“ и повика на прекин на огнот.
Американскиот сојузник Израел ги бомбардираше милитантите на Хезболах поддржани од Техеран во Либан и вели дека конфликтот не е дел од примирјето меѓу Иран и САД. Иран инсистираше дека борбите во Либан мора да престанат. Преговорите меѓу Израел и Либан се очекуваат следната недела во Вашингтон. Израелскиот премиер Бенјамин Нетанјаху на 9 април изјави дека одобрил директни разговори, додека канцеларијата на либанскиот претседател Џозеф Аун на 10 април соопшти дека преговорите меѓу Израел и Либан се очекува да започнат на 14 април.
