Маж вооружен со пушка и ножеви упадна во лобито пред гала вечера за новинари, на која присуствуваа и претседателот Доналд Трамп и повеќе високи американски функционери, пред агентите на Тајната служба да го совладаат и приведат. Трамп беше итно евакуиран и не е повреден.

Гостите легнаа под масите додека се одвиваше инцидентот, а некои пријавија дека слушнале истрели пред огромната подземна балска сала во хотелот „Вашингтон Хилтон“, каде што се одржуваше настанот.

Еден службеник за спроведување на законот рече дека вооружен маж отворил оган. Припадник на обезбедувањето бил застрелан во панцир, но се очекува да биде добро, изјавија неколку извори за новинската агенција АП.

Осомничениот за пукањето, кого Трамп го опиша како „болна личност“, е идентификуван како Кол Томас Ален, 31-годишник од Торенс, Калифорнија.

„Кога си влијателен, те напаѓаат. Кога не си влијателен, те оставаат на мира. Се чини дека мислат оти делувал сам“, рече Трамп, неповреден и сè уште во смокинг, во Белата куќа два часа подоцна.

Градоначалничката на Вашингтон, Мјуриел Баузер, рече дека „нема причина да се верува дека некој друг е вмешан“. Видеото објавено од Трамп го покажа осомничениот како трча покрај безбедносните барикади, додека агентите на Тајната служба трчаат кон него.

„Се чини дека во овој момент нема никаква опасност за јавноста“, рече Баузер на посебна прес-конференција.

Сите службени лица заштитени од Тајната служба беа евакуирани. Меѓу присутните беа Трамп, потпретседателот Џеј-Ди Венс, министерот за одбрана Пит Хегсет и државниот секретар Марко Рубио.

Државниот обвинител Тод Бланш изјави дека наскоро ќе бидат поднесени обвиненија поврзани со нападот, а директорот на ФБИ, Кеш Пател, кој го придружуваше Трамп, рече дека се испитуваат пушка и чаури пронајдени на местото на настанот.