Доналд Трамп изјави дека Иран може да се јави телефонски ако сака да преговара за крај на војната, додека иранскиот министер за надворешни работи Абас Арагчи денеска пристигна во Москва за да бара поддршка од Владимир Путин.

Надежите за обновување на мировните разговори избледеа откако Трамп го откажа патувањето на американските преговарачи Стив Виткоф и Џаред Кушнер во Исламабад во саботата, каде што Арагчи разговараше само со пакистанските функционери.

„Ако сакаат да разговараат, можат да дојдат кај нас или да ни се јават. Знаете, постои телефон. Имаме убави, безбедни линии. Тие знаат што треба да има во договорот, едноставно е. Тие не смеат да имаат нуклеарно оружје, инаку, нема зошто да се среќаваме. Иран досега понуди многу, но недоволно“, рече Трамп.

Иако Трамп го продолжи примирјето на неодредено време, засега нема назнаки дека двете страни се блиску до договор и дека наскоро ќе се сретнат.

Сајтот „Аксиос“ објави дека Иран преку посредникот Пакистан доставил нов предлог за повторно отворање на Ормускиот Теснец и за завршување на војната, при што за иранските нуклеарни амбиции би се разговарало подоцна. Арагчи се врати во Исламабад по посетата на Оман, по што замина за Русија.

Иранскиот претседател Масуд Пезешкијан му рече во телефонски разговор на пакистанскиот премиер Шехбаз Шариф дека Техеран нема да влегува во „наметнати преговори под закани или блокада“. Додаде дека САД прво треба да ги отстранат пречките, вклучително и поморската блокада, пред преговарачите да можат да почнат да ги поставуваат темелите за решение.