Доналд Трамп не е среќен со последниот ирански предлог за решавање на двомесечниот конфликт помеѓу САД и Иран, изјави еден американски функционер. Според овој предлог, за иранските нуклеарни амбиции би се разговарало дури по завршувањето на војната и решавањето на спорот околу Ормускиот Теснец.

„Ова не е нешто што би го задоволило Трамп, кој смета дека нуклеарните прашања мора да се решаваат од самиот почеток. Затоа тој не е среќен со последниот ирански предлог“, изјави функционерот за „Ројтерс“.

Портпаролката на Белата куќа, Оливија Вејлс, изјави дека САД нема да преговараат преку медиумите и дека владата на Трамп има јасни црвени линии.

Претходен договор од 2015 помеѓу Иран и повеќе други земји, вклучувајќи ги и САД, остро ја ограничи иранската нуклеарна програма, за која Техеран долго време тврдеше дека е за мирни, цивилни цели. Но, тој договор пропадна кога Трамп еднострано се повлече од него во својот прв мандат.

Надежите за обновување на мировните разговори избледеа откако Трамп го откажа патувањето на американските преговарачи Стив Виткоф и Џаред Кушнер во Исламабад во саботата, каде што иранскиот министер за надворешни работи Абас Арагчи разговараше само со пакистанските функционери. Трамп потоа изјави дека Иран може да се јави телефонски ако сака да преговара за крај на војната.

Арагчи вчера се сретна со Владимир Путин во Санкт Петербург, при што ги обвини САД за неуспехот на преговорите.

„Имаше некои знаци на напредок во преговорите. Американскиот пристап значеше дека претходната рунда преговори не успеа да ги постигне своите цели, и покрај постигнатиот напредок. Ова се случи поради нивните прекумерни барања и погрешни пристапи“, кажа Арагчи.