Адвокатите на осудениот воен злосторник Ратко Младиќ чекаат одлука од судот на Обединетите нации за нивното барање тој да биде пуштен од затворот во Хаг, со образложение дека е на самиот крај од својот живот.

Младиќ (84) беше осуден на доживотна казна затвор во 2017 година за геноцид, воени злосторства и злосторства против човештвото извршени за време на војните во поранешна Југославија меѓу 1992 и 1995 година. Казната за човекот познат како „Касапот од Босна“ беше потврдена во жалбената постапка во 2021 година.

Во деталниот поднесок до судот доставен во петокот, неговиот правен тим наведува дека Младиќ веќе долг период е врзан за кревет или користи инвалидска количка. Тие додаваат дека тој претрпел и мозочен удар за време на телефонски разговор со неговиот син, по што речиси целосно ја изгубил способноста за зборување. Двајца лекари кои ја оцениле неговата здравствена состојба сметаат дека таа е сериозна и дека постои висок ризик од смрт во блиска иднина.

Поради ова, адвокатите бараат негово итно привремено или условно ослободување во болница или хоспис каде што се зборува српски јазик. Одбраната со ова практично бара негово враќање дома, а српскиот министер за правда Ненад Вујиќ јасно кажа дека неговата влада е подготвена да даде гаранции до судот доколку се прифати барањето за ослободување.

Судијката Грациела Гати Сантана побара независна здравствена проценка.

Ратко Младиќ командуваше со силите на босанските Срби во текот на деведесеттите години. Неговите трупи извршија етничко чистење во Босна и Херцеговина, го држеа под опсада Сараево каде загинаа повеќе од 10.000 луѓе и го извршија масакрот во Сребреница во кој беа убиени 8.000 мажи и момчиња. Младиќ исчезна во 1995 година, а по 16 години во бегство беше пронајден во рурален дел на Србија во 2011 година. Судењето во Хаг започна во 2012 година, а првостепената пресуда беше донесена пет години подоцна.