Украински беспилотни летала во петокот по четврти пат во период од 16 дена го погодија руското пристаниште Туапсе на Црното Море. Локалните служби се справуваат со еколошка катастрофа од големи размери, бидејќи над областа се шират облаци од токсичен црн чад, а во морето истекува нафта.

Од Службата за безбедност на Украина (СБУ) соопштија дека дроновите повторно ги нападнале морското пристаниште и рафинеријата, кои се сметаат за важен центар за извоз на руски енергенси.

Руските власти потврдија дека се одвива обемна операција за гаснење на пожарот во пристаништето, при што нема пријавено жртви. Рафинеријата беше цел на напади најмалку двапати од средината на минатиот месец, што предизвика прекин на производствениот процес и појава на големи нафтени дамки долж брегот. Загадувањето веќе ги уништи плажите во ова познато туристичко место.

Според информациите од руските надлежни служби, до петокот се отстранети повеќе од 13.300 кубни метри мазут и контаминирана земја. Државните медиуми објавија извештаи од теренот кои покажуваат дека мазутот е навлезен длабоко во крајбрежниот појас.