Денеска околу 9 часот, летовите беа запрени околу еден час на аеродромот во Минхен во јужна Германија откако двајца пилоти пријавија дека виделе дрон, соопштија аеродромските власти и полицијата. За време на затворањето, повеќе од 20 летови што требаше да слетаат во Минхен беа пренасочени кон други аеродроми, изјави портпаролот на аеродромот.

Околу 9 часот, двајца пилоти во одделни авиони на пистата пријавиле дека виделе дрон над аеродромот, што доведе до затворање, рекоа тие. Летовите продолжија околу еден час подоцна.

„Обемните полициски операции, вклучително и пребарување на погодената област со полициски хеликоптер, не дадоа резултати. Бидејќи беше исклучена можноста за закана за воздушниот сообраќај, затворањето беше укинато во 10:05 часот“, рече портпаролот на полицијата додавајќи дека е отворена истрага за да се утврди што се случило.

Аеродромот лани во октомври беше затворен двапати во рок од 24 часа поради сомнеж за дронови.