Израелскиот министер за одбрана Израел Кац изјави дека Израел нема да се повлече од заземената територија во Либан, што потенцијално го загрозува прелиминарниот договор помеѓу Иран и САД, а вклучува отворање на Ормускиот Теснец и понатамошно продолжување на нестабилниот прекин на огнот. Деталите од договорот не беа веднаш објавени, а Иран најави дека неговата имплементација нема да започне до потпишувањето, кое, како што рече клучниот посредник Пакистан, ќе се одржи в петок во Швајцарија.

„Израел нема да се повлече од Либан и планира да остане на неодредено време на териториите што ги држи во Либан, Сирија и Појасот Газа. Ако Иран го нападне Израел поради израелските напади во Либан, ќе го нападнеме Иран со голема сила“, кажа Кац.

Иран го поврза привремениот договор со САД со запирање на нападите врз Хезболах во Либан.

Во изминатите две и пол години, Израел ја презеде контролата врз територија од 1.000 квадратни километри во Газа, Либан и Сирија и ги смета окупираните области за безбедносни зони.

„Безбедносната зона во јужен Либан ќе биде исчистена од локалните жители и од целата терористичка инфраструктура на Хезболах“, рече Кац.

Американскиот потпретседател Џеј-Ди Венс го нарече договорот со Иран голем момент за САД.

„Ова ќе ја заврши војната и би можело да помогне во стабилизирањето на целиот регион. Целта на Трамп беше да ја елиминира нуклеарната закана од Иран и тоа е готово. Сега Блискиот Исток има можност да изгради нова ера на просперитет, што би можела да му користи и на американскиот народ. Тоа е многу, многу голема победа“, кажа Венс.