Предлогот на новиот градоначалник на Венеција, Симоне Вентурини, за можно значително зголемување на цената на влезницата за еднодневните излетници во градот предизвика дебата.

„Ако моментално изнесува помеѓу 5 и 10 евра, мојот предлог е да се зголеми на помеѓу 30 и 50 евра во одредени денови“, изјави тој.

Вентурини победи како кандидат од централно-десничарските партии на Локалните избори на крајот на мај, наследувајќи го Луиџи Бруњаро, кој беше градоначалник една деценија.

Оваа година, Венеција им наплаќа на посетителите со краток престој 10 евра за билет за вкупно 60 дена до крајот на јули – дури и ако поминуваат само неколку часа на улиците околу плоштадот „Свети Марко“ и мостот Риалто. Оние кои резервираат најмалку три дена однапред плаќаат 5 евра. Целта на мерката е да се ограничи масовниот туризам, но критичарите веќе некое време тврдат дека сегашната влезница не одвраќа многу од доаѓањето во Венеција.

За време на изборната кампања, Вентурини предложи зголемување на влезницата во одредени денови кога се очекува особено голем број еднодневни посетители. Сепак, тој нема моќ да ја зголеми влезницата. Иако таксата беше воведена со општински подзаконски акт, горната граница беше утврдена со државниот закон. Затоа, Вентурини мора да се консултира со владата во Рим.

Експертот за уставно право Лудовико Мацароли изрази правна загриженост, и рече дека наплатата од 50 евра може да се толкува како ограничување на слободата на движење.