Српскиот претседател Александар Вучиќ изјави дека ќе поднесе оставка во рок од неколку недели и дека земјата ќе одржи предвремени претседателски и парламентарни избори. Објавата на Вучиќ, кој е на власт како претседател или премиер 12 години, дојде по 18 месеци постојани антивладини демонстрации предводени од студентите, што беа поттикнати од уривањето на настрешницата на железничката станица во Нови Сад во ноември 2024 година, кога загинаа 16 лица.

„Ќе бидам претседател само уште неколку недели, а потоа ќе поднесам оставка“, им рече Вучиќ на своите поддржувачи на провладиниот митинг во Белград.

Вториот и последен мандат на Вучиќ треба да истече кон средината на 2027.

Вучиќ кажа дека ќе ѝ помогне на неговата Српска напредна партија (СНС) да победи на претседателските избори и на предвремените парламентарни избори, исто така првично закажани за 2027.

„Мојот предлог е нашата, победничка листа на претстојните избори да се вика ‘Обединета Србија‘“, кажа Вучиќ.

Тој не прецизираше кога ќе поднесе оставка, ниту кога ќе го распушти парламентот, што е предуслов за предвремени парламентарни избори.

Вучиќ веројатно нема да се повлече од политичката сцена бидејќи неговата оставка би можела да му го отвори патот да стане премиер ако неговата партија триумфира на парламентарните избори. Аналитичарите велат дека Вучиќ ќе се обиде да постави свој сојузник за нов претседател за да може да продолжи да ги држи столбовите на власта.

Активистите од студентското движење и опозицијата рекоа дека сакаат да ги предизвикаат Вучиќ и СНС на изборите.

„Со поднесување оставка и со предвремени претседателски и парламентарни избори Вучиќ се обидува да го спречи својот неизбежен пад поради протестите и студентското движење, кое има поголема поддршка од него“, вели Саво Манојловиќ, лидер на студентското опозициско движење „Помести-промени“.