Новооткриениот портрет на поранешната германска канцеларка Ангела Меркел предизвика голем раст на бројот на посетители во берлинскиот музеј Боде. Од поставувањето на сликата на 1 јули, бројот на посети значително се зголеми во комплексот познат по збирките на скулптури, византиска уметност, монети и медали.

Портпаролот на музејскиот комплекс соопшти дека дневниот број на посетители во просек е за 85 отсто повисок во споредба со јуни. Во моментов се регистрираат околу 900 посети дневно, иако сè уште не може да се предвиди дали овој тренд ќе продолжи. Во првите денови по отворањето на изложбата, многу луѓе наменски доаѓале за да ја видат сликата и барале насоки од службата за обезбедување.

Меркел, која ја предводеше Германија 16 години до декември 2021 година, по заминувањето од функцијата почека пред да избере уметник бидејќи и било потребно растојание. При откривањето на делото на крајот на јуни, таа објасни дека портретот не требало да биде само уште една обврска од списокот со задачи, туку сакала да ужива во целиот процес.

Автор на делото е 28-годишниот француско-германски уметник Жереми Керас, кој потекнува од музичко семејство од Фрајбург и во 2022 година испратил рачно напишана апликација до Меркел. На сликата таа носи светлосин блејзер на златно-кафеава позадина. Поранешната канцеларка ја избрала сината боја поради нејзиниот силен и авторитативен израз. На нејзиното лице паѓа силна светлина со цел да се изразат трагите на моќта, се наведува во описот на делото.

Посетителите ќе можат да го видат портретот во музејот Боде до 4 октомври, лоциран на само неколку метри од домот на Меркел во главниот град, по што делото ќе биде отстапено на Канцеларијата.