Украинскиот претседател Володимир Зеленски очекува Северна Кореја да ѝ обезбеди на Русија дополнителни војници и тешко вооружување за војната против Украина, изјави тој синоќа во своето вечерно видеообраќање. Меѓу другото, тој рече дека Русија се подготвува да распореди уште 30.000 севернокорејски војници во регионот Воронеж. Пјонгјанг, исто така, има намера да ѝ испорача на Русија дополнителни лансирни рампи за балистички ракети, рече тој.

Зеленски изјави дека ова е дел од воените планови на Москва за претстојната есен. Според проценките на украинското разузнавање, кои Зеленски ги наведе во своето видео, рускиот претседател Владимир Путин и понатаму нема намера да бара мир.

Зеленски ја рече дека планираната севернокорејска поддршка за Москва е закана, пред сè, за Азија.

„Русија ѝ помага на Северна Кореја да научи како да води војна и да го подобри своето оружје, давајќи ѝ искуство во реална употреба на оружјето“, рече тој. „Сето ова претставува закана за сите во Азија кои се наоѓаат во дострелот на севернокорејските ракети“.

Северна Кореја веќе испрати до 15.000 војници за руската војна против Украина во текот на минатата година. Војниците ѝ помогнаа на Москва да ги поврати териториите во регионот Курск, кои Украина ги зазеде за време на ненадејна офанзива. Според непотврдени проценки, загинале најмалку 2.000 Севернокорејци.

Москва и Пјонгјанг се поврзани со договор за стратешко партнерство. Министрите за надворешни работи на двете земји само пред неколку дена го потврдија блиското партнерство меѓу нивните нации.