Во Националниот парк (НП) „Пелистер“ се одржа првата работилница за генетски мониторинг на кафеавата мечка, како значаен чекор кон добивање попрецизни податоци за нејзината бројност и распространетост во Македонија. Вработените во Националниот парк се запознаа со неинвазивниот метод на мониторинг преку собирање примероци од измет, при што обуката опфати правилно собирање, обележување, чување и евидентирање на примероците.

За спроведување на мониторингот беа обезбедени и специјализирани прибори за теренска работа. Генетскиот запис е единствен за секоја мечка.

Анализата на собраните примероци ќе овозможи идентификација на поединечни единки и добивање попрецизни информации за бројноста, распространетоста и генетската разновидност на популацијата на кафеавата мечка. Овие податоци се од особено значење за планирање на идните мерки за заштита и за одржливо управување со популацијата на кафеавата мечка.

Активноста се реализира во рамките на проектот „LIFE DinPin Bear“, кофинансиран преку програмата „Лајф“ на Европската Унија, во соработка со Македонското-еколошко друштво и Министерството за животна средина и просторно планирање.

Ж. ЗДРАВКОВСКА