По рекордни 286 дена на море, американскиот носач на авиони „Абрахам Линколн“ пристана во Тајланд со својот екипаж од речиси 5.000 луѓе.
„Линколн“ беше распореден во ноември минатата година и беше вклучен во поморската блокада на САД и во борбените операции против Иран. Вообичаено, поморските распоредувања траат меѓу шест и девет месеци, но во време на конфликт тоа може да се продолжи.
Придружуван од други американски воени бродови, носачот на авиони ќе застане во Тајланд на пет дена заради одмор и закрепнување, според тајландските власти. Тајланд стана сојузник на САД со договор од 1954, пред да биде назначен за главен сојузник надвор од НАТО во 2003 година.
Пристигнувањето на илјадници воени лица може да донесе економски поттик за популарниот туристички град Патаја, кој има долгогодишна репутација како дестинација за секс-туризам. Иако тајландската полиција ги потсетува американските посетители дека проституцијата е технички нелегална во Тајланд, се смета дека во градот има меѓу 25.000 и 50.000 сексуални работнички.
Тајландските власти изјавија дека има неколку места каде што на американските војници нема да им биде дозволено да одат. Едно од нив е Сои 6, кое се протега до главната плажа и е познато по концентрацијата на провокативни барови. Морските спортови и продавниците за канабис исто така официјално им се забранети на американските војници.
Водечките специјализирани воени медиуми „Нејви тајмс“ и „Старс е страјпс“ минатиот месец објавија дека имало повеќе обиди за скокање од бродот од страната на морнарите поради лошите услови и зголемениот ментален стрес. Екипажот имал само два дена на копно, откако бродот исплови од Сан Диего на 21 ноември.
