Воени семејства и членови на Конгресот предупредија дека се засилува кризата со менталното здравје на американскиот воен брод „Абрахам Линколн“, бидејќи неговите 5.000 морнари и војници се соочуваат со рекордно долго распоредување на море поврзано со војната со Иран.

Два водечки специјализирани воени медиуми, „Нејви тајмс“ и „Старс енд страјпс“, известуваат дека имало повеќе обиди за скокање од бродот од страна на морнарите, бидејќи лошите услови и менталниот стрес на „Линколн“ го достигнуваат врвот. Екипажот е во деветтиот месец на море и поминал 250 дена без да пристане, рекорд за носач на авиони во модерното време.

Семејствата ја изразија својата загриженост за најблиските на бродот „Линколн“ на емотивен состанок со водачите на морнарицата во Сан Диего, објави „Старс енд страјпс“. Една жена рекла дека добила порака од нејзиниот сопруг, во која ѝ пишал дека „се надева дека нема да се разбуди утре“.

„Нејви тајмс“ објави детали за спречени обиди за самоубиство на носачот на авиони за време на тековното распоредување. Анабел Лома изјавила за весникот дека нејзиниот сопруг се обидел да скокне од бродот откако неговиот престој на море постојано се продолжувал.

„Екипажот се соочува со мувлосани тушеви, расипани тоалети и машини за перење алишта и долги периоди без топла вода, а оброкот е сведен на половина чаша ориз и две тортиљи. Нема сапун, дезодоранс или паста за заби“, кажа демократскиот конгресмен Мајк Левин.

Воениот брод го напушти Сан Диего на 21 ноември и првично требаше да оди за Пацификот, но беше пренасочен кон Блискиот Исток откако започна војната со Иран. Оттогаш, екипажот имал само два дена на копно, во Гуам во декември и во Оман во јули. Распоредувањето требаше да заврши во мај, но беше продолжено неколкупати поради тековната војна.