Белорусија се согласи да ослободи 25 затвореници во замена за понатамошно ублажување на санкциите на САД, изјави пратеникот на претседателот Доналд Трамп, Џон Коул.

Договорот е дел од долги преговори во кои Вашингтон го повикува белорускиот претседател Александар Лукашенко да ослободи стотици луѓе, вклучувајќи активисти за човекови права, политички активисти, новинари и адвокати, во замена за ублажување на санкциите и меѓународната изолација.

„Се согласивме на привремен договор и како знак на добра волја, Белорусија ќе ослободи 25 лица, а САД ќе ги укинат санкциите за две компании“, рече Коул.

Ова е десетпати помала бројка од она што го побара Коул кога последен пат го посети Минск во март.

„Двете страни ќе работат на решавање на отворените прашања за да се отвори патот за ослободување на уште затвореници и отстранување на понатамошни санкции. Ќе продолжиме да ги подобруваме односите помеѓу САД и Белорусија“, кажа Коул.

Тој му вети на Лукашенко дека ќе ги натера американските банки да вратат десетици милиони долари замрзнати белоруски средства.

Белоруската група за човекови права „Вијасна“ вели дека поранешната советска држава сè уште држи повеќе од 900 политички затвореници.