Европската Унија развива акциони планови според кои четирите земји кои се најблиску до приклучување кон блокот ќе добијат јасен, детален пат кон членството, додека другите ќе бидат изоставени. Во втората група би била и Македонија.

Се разгледуваат целни патокази за Црна Гора, Украина, Молдавија и Албанија, изјавија за „Политико“ двајца високи претставници на Европската комисија кои работат на нацрт-предлозите.

Овие четири земји се сметаат за фаворити за приклучување кон ЕУ, но сè уште се соочуваат со бавен напредок и нејасни временски рокови за тоа кога би можеле формално да бидат примени. Иако Брисел долго време ги поддржува нивните кандидатури за членство, овие патокази значат дека тие ќе добијат гаранции дека ќе бидат примени доколку продолжат со основните реформи, како и привремени рокови за завршување на преговорите.

„Патоказите ќе разјаснат точно што се очекува од секоја земја-кандидат и ќе создадат обврски за сегашните членки, кои треба да дадат согласност за процесот да продолжи. Плановите, исто така, поставуваат приближни датуми за тоа кога преговарачките кластери ќе бидат формално завршени“, рече еден од функционерите

Во својот говор за состојбата на Унијата во септември, претседателката на Европската комисија, Урсула фон дер Лајен, вети целна поддршка за земјите-кандидатки кои постигнале најголем напредок.

На Косово, Македонија и Босна и Херцеговина нема да им бидат понудени патокази во оваа фаза, потврдија функционерите. Ова важи и за Грузија, Турција и Србија, чии апликации запреа поради загриженост за демократското и судското назадување.

„Новите мапи ќе обезбедат пат кон завршување на преговорите за пристапување и ќе утврдат јасна листа на приоритети: рокови и конкретни резултати што ќе им помогнат на најнапредните кандидатки да ги спроведат потребните реформи“, изјави портпарол на ЕК.