Дебитантскиот филм на Андреј Волкашин „Сладоста на горчливите нешта“ ќе има светска премиера на 17 ноември на 30. издание на Филмскиот фестивал во Талин, што во 2014 доби статус од А категорија. Филмот ќе се прикаже во натпреварувачката програма Прв филм за филмови од дебитантски автори и ќе има вкупно три проекции за време на фестивалот што ќе се одржи од 6 до 22 ноември.

Волкашин, кој е режисер и сценарист на филмот, го опиша „Сладоста на горчливите нешта“ како женска приказна за забранета љубов, додавајќи дека е инспириран од роман што го пишувал порано. Филмот се снимаше во селото Петрово над Гевгелија и во Демир Капија.

„Се чувствувам како да сонувам, а уште не сме ни на премиерата во Талин. Причината за тоа е што дебитантски филм се прави исклучително долго и страсно. Сценариото се промени многупати затоа што јас сакам да црпам од екипата. Ова сценарио произлегува од романот што го пишував многу долго време за мојата баба, мојата тетка, мајка и сите жени во поширокиот круг на фамилијата. Јас сум од мало место каде што традицијата е прилично ригорозна и има многу јасни барања од мажите и од жените какви треба да бидат. Филмот не е никаква екранизација, ниту биографски како романот, но оттаму ми дојде инспирацијата“, рече Волкашин.

Се чувствувам како да сонувам, а уште не сме ни на премиерата во Талин, рече Волкашин. (Фото: К. Попов)

Дејството на филмот го носат главните актери Зорица Нушева (Дора) и Лео Долорес Поповиќ (Бандида).

„Дора е лик кој се движи помеѓу грижата, страстите, тајната и вината, лик кој е постојано во борба помеѓу грижата за семејството и куќата од една страна и скриените желби и страсти од друга страна. Таа е жена која ја истражува својата сексуалност, но со вина и со страв од осуда“, рече Нушева.

Поповиќ призна дека снимањето на филмот ѝ било најубавото искуство досега, ама не било удобно.

„Ова беше улога каде што морав најдлабоко во себе да брцнам. И не беше презабавно. Беше грдо, извитоперено и изопачено и морав да се погледнам себеси со многу други очи. Бандида може да биде секој. Мислам дека сите имаме Бандида во животот“, кажа Поповиќ.

Филмот е копродукција на Македонија, Хрватска и Бугарија, со поддршка од Холандија и Еуримаж, а беше поддржан со 19 милиони денари (310.000 евра) на конкурсот на Агенцијата за филм во првиот рок во 2020.

Во актерската екипа се и Ана Костовска и Јана Никодиновска. Директор на фотографија е Кирил Проданов, сценографијата е на Бојана Бачварова, костимографка е Илина Чолак, а маската и шминката се на Симона Ристевска. Продуцентка на филмот е Елена Станишева, а копродуценти се Павлина Ангелова, Николај Тодоров и Звонимир Муниврана.

Ова е вторпат македонски филм да е во конкуренцијата во Талин, по „Исцелител“ на Ѓорче Ставрески во 2017, а „17“ на Косара Митиќ годинава ќе игра во паралелната селекција Детски права.

Г. КОНЕВ