Русија ги поддржува сите чекори насочени кон обновување на односите со европските земји, изјави Владимир Путин, додавајќи дека избувнувањето на каков било конфликт би довело до ситуација без победници. Коментирајќи го неговиот телефонски разговор со лидерите на Норвешка и Финска, Путин рече дека Русија е подготвена за потенцијална војна со Европа, иако не ја сака.

„Ги поддржуваме сите чекори и активности насочени кон обновување на целосни и функционални односи со европските земји. Ние сме подготвени, но не сакаме војна со Европа. Ако некој го сака тоа, нека се подготви, но во моментов не ја постигнале својата цел – да ѝ нанесат стратешки пораз на Русија. И ако работите отидат предалеку, воопшто нема да има победници. Никој нека не го заборави тоа“, кажа Путин.

Тој ги бранеше финскиот претседател Александер Стуб и норвешкиот премиер Јонас Гар Стјоре што се одлучиле на телефонски разговор со него, и покрај критиките од некои европски престолнини.

Претставници на Пентагон во последните недели побарале од неколку членки на НАТО да ја ублажат својата реторика во врска со Русија, тврдејќи дека некои изјави на европските лидери и функционери ја поткопале континенталната безбедност, изјавија за „Ројтерс“ четири лица запознати со ова прашање. Меѓу земјите кои добиле пораки со кои се повикуваат да ги контролираат јавните изјави се Литванија, Латвија и Естонија, изјавија лицата.

Некои западни функционери тврдат дека нагласувањето на заканата што ја претставува Москва би можело да му оди во прилог на Кремљ, за кој велат дека се стреми да сее страв и да ја поткопа поддршката за Украина.