Ревијата на македонскиот филм во Белград по вторпат ќе се одржи од 12 до 14 ноември во културната установа „Пароброд“, со програма во која се вклучени играни, документарни и краткометражни филмови, средби со филмски автори, мастерклас и музичка програма.

На тридневната ревија ќе бидат прикажани „Приказната за Силјан“ на режисерката Тамара Котевска, „Исцелител“ на Ѓорче Ставрески, „Балканот не е мртов“ на Александар Поповски и четири краткометражни филмови од македонски автори.

„Исцелител“ ќе се прикаже вечерва, а Ставрески утре (13 ноември) ќе одржи мастерклас на тема „Филмската тензија во процесот на создавање филм“, посветен на филмското раскажување и авторскиот процес. Утре на програмата е „Балканот не е мртов“, а документарниот филм „Приказната за Силјан“ ќе се прикаже на 14 ноември. На проекцијата ќе присуствува и Котевска и ќе има средба со публиката.

На програмата на 14 ноември се и краткометражните филмови „Награда“ на Лидија Мојсовска, „Да се чува планината“ на Изер Алиу, „Пепи и Муто“ на Ѓорѓи Унковски и „Дали си маж“ на Ѓорче Ставрески.

„Покрај филмските проекции, ревијата ќе понуди и архивски филмски журнали посветени на филмската и културната историја на Македонија, дел од кои досега не биле прикажани пред пошироката јавност“, вели организаторот Јорданчо Петковски .

Влезот за сите програми е бесплатен.