Изложба посветена на бакнежот како симбол на љубовта, интимноста, моќта и предавството е отворена во уметничкиот центар „Сејнсбери“ во Норич, Велика Британија. Поставката насловена „Последниот човечки бакнеж“ опфаќа слики, скулптури, фотографии и други уметнички дела кои го истражуваат значењето на бакнежот низ историјата и различните култури.

На изложбата се претставени дела на познати уметници, меѓу кои Огист Роден, Вилијам Блејк, Трејси Емин и Волфганг Тилманс.

Поставката е поделена на пет тематски целини кои го прикажуваат бакнежот како израз на романтична љубов, верска посветеност, пријателство, општествени односи, но и измама и предавство.

Преку историски предмети и современи уметнички дела, посетителите можат да проследат како се менувало значењето на бакнежот низ вековите и како еден едноставен човечки гест може да пренесе различни чувства и пораки.

Изложбата е дел од пошироката програма „Како ја наоѓаме љубовта?“, преку која центарот „Сејнсбери“ ги истражува човечките односи, привлечноста и интимноста.

Поставката ќе биде отворена до 11 април 2027 година.