Бегалската населба Биди Биди во северна Уганда, според нов урбанистички план треба да прерасне во современ град со домови, училишта, здравствени установи, спортски терени и други јавни содржини. Планот го претстави архитектонското студио „Бјарке Ингелс груп“, во рамките на проектот „Градови на иднината за бегалците“.

Во Биди Биди живеат околу 230.000 бегалци, а новиот урбанистички план предвидува простор за дополнителни 155.000 жители. Целта е населбата, која со години функционира како бегалски камп, постепено да се развие во град со сопствена инфраструктура и економија.

Според проектот, домовите ќе бидат организирани околу заеднички дворови, каде што семејствата ќе можат да готват, да се дружат и да работат. Предвидени се покриен пазар, работилници, техничко училиште, здравствен центар, спортски терени и простори за културни активности.

Во Биди Биди живеат околу 230.000 бегалци, а новиот урбанистички план предвидува простор за дополнителни 155.000 жители (Фото: Дезен)

Посебно внимание е посветено на екологијата. За изградбата се предлага користење локални материјали, како земјени тули, камен и бамбус. Во планот се вклучени и соларна енергија, системи за пречистување вода, преработка на отпад, оранжерии и земјоделски површини.

Архитектот Бјарке Ингелс, основач на студиото БИГ, смета дека бегалските населби треба да се планираат како градови во кои жителите ќе имаат можност да работат, да учат и да изградат подобра иднина, наместо да зависат од хуманитарна помош.