Германската канцеларка Ангела Меркел ја поддржа идејата за воведување построги правила за купопродажба на фудбалери, откако летниот преоден рок донесе неколку неразумни трансфери.

За неа е неприфатливо за еден фудбалер да се плати над 200 милиони евра, колку што чинеше трансферот на Нејмар од Барселона во ПСЖ. Истовремено, за уште двајца фудбалери летово беше надмината сумата од 100 милиони.

„Мојот став за финансискиот тек на настаните во професионалниот фудбал е еднакво критичен како и на многумина други. Тие суми се неприфатливи за обичните смртници“, изјави Меркел во интервјуто за весникот „Мителбаерише цајтунг“.

Таа ги повика ФИФА и УЕФА одново да ги приспособат прописите.

„Треба да се задржи поголема рамнотежа помеѓу клубовите, инаку, се ризикува тие суми само уште повеќе да се зголемуваат“.

Први чекори на тој план презеде англиската Премиерлига, каде што летниот преоден рок во иднина ќе завршува до почетокот на сезоната, што е секогаш во првата половина на август, а не како досега, на 31 август.