Канадски милијардер и неговата сопруга беа најдени мртви во нивниот дом во Торонто во околности кои што полицијата ги опиша како сомнителни.

Телата на Бери Шерман и сопругата Хани беа најдени во визбата од агент за недвижности, според извештаите.

Шерман беше основач и претседател на фармацевтскиот гигант „Апотекс“, кој што продава генерички лекови ширум светот. Тој беше еден од најбогатите луѓе во Канада и истакнат филантроп.

Полицијата соопшти дека нема знаци за насилен влез на имотот, а локалните медиуми јавија дека истражителите засега не бараат осомничени. Детективот Брендон Прајс за канадската државна телевизија „Си-Би-Си“ изјави дека сè се обидуваат да утврдат дали станува збор за насилна смрт.

Полицијата откри малку детали и не ги потврди идентитетите на починатите, но тие беа именувани за локалните медиуми од пријатели и функционери кои беа шокирани од веста.