Партијата на унгарскиот премиер Виктор Орбан доживеа изненадувачки пораз на вонредните локални избори во една општина на само неколку недели пред парламентарните избори. Орбан, познат по антиимигрантската и популистичка реторика, на изборите на 8 април бара трет последователен мандат.

Претходно месецов, Орбан ја нарече опозицијата безнадежна, но вчерашната победа на Петер Марки-Жај во клучната општина Ходмежовашархели може да му ги наруши плановите. Марки-Жај, кој беше независен кандидат, но беше поддржан од сите опозициски партии, освои 57,5% од гласовите, додека кандидатот на владејачката партија Фидеш, Золтан Хегедуш освои 41,5% од гласовите.

Унгарски аналитичари гледаат на изборите во Ходмежовашархели, мал град во јужна Унгарија, како предвесник на гласачкото расположение во земјата. Резултатот беше шокирачки за поддржувачите на Фидеш, посебно што Ходмежовашархели е дом на клучниот сојузник на Орбан Јанош Лазар. На претходните локални избори во 2014 година, Фидеш победи со 61% од гласовите.

Сепак, Фидеш во анкетите за парламентарните избори има поддршка од околу 50%, но можно е да го загуби двотретинското мнозинство освоено пред четири години.