Десничарската влада на Австрија планира да затвори седум џамии и да протера десетици имами во она што го нарече почеток на борбата против радикалниот ислам и странското финансирање на радикалните групи, што од Турција беше опишано како расистички потег.

Коалицијата на конзервативци и на крајна десница дојде на власт во Австрија по ветувањата дека ќе спречи нов наплив на мигранти и ќе им ги намали бенефициите.

Најновата одлука го следи таканаречениот закон за ислам, усвоен во 2015 година, кој забранува странско финансирање на религиозни групи и им наметнува на локалните муслимански организации да имаат позитивен основен став кон австриските држава и општество.

„За паралелните здруженија на политичкиот ислам и за радикалните тенденции нема место во нашата држава“, изјави канцеларот Себастијан Курц, во чие време како министер за интеграција и беше донесен законот.

Неговиот заменик Хајнц-Кристијан Штрахе додека дека „ова е само почеток“.

Во Австрија има 600.000 муслиманско население, повеќето од нив со турско потекло.

Од владата велат дека од државата би можеле да бидат протерани околу 60 имами кои ѝ припаѓаат на Турско-исламската унија за културна и општествена соработка, која се поврзува со владата на Реџеп Таип Ердоган.