Пронајден е 23-годишниот француски турист кој вчера попладне се загуби на Пелистер. Него го најдоа и го спасија битолските спасувачи од Дирекцијата за заштита и спасување, инаку сите членови на Планинарско-спортскиот клуб „Пелистер“ од Битола.

По неколку часовна потрага, залутаниот турист беше пронајден по полноќ во високите делови на планината.

„Го најдовме благодарение на телефонот кој го носеше со него. Неговите пријатели од Битола ни го дадоа неговиот број. Момчето беше залутано кај врвот Антена, откако го добивме на телефон, го наведовме да тргне кон Мало Езеро и го најдовме на патот. Беше исплашен, му дадовме храна, вода и го слеговме во Битола“, рече планинарот и спасувач Петар Нолев.

Спасувачите вчера мораа да ја напуштат крштевката на ќерката на Нолев за да тргнат во потрага по загубениот странец.

Ж. ЗДРАВКОВСКА