120 ЛИЦА ОД ГЕВГЕЛИСКО ЗАРАЗЕНИ СО ЕШЕРИХИЈА КОЛИ ОТИ ВОДОВОДОТ БИЛ ЗАГАДЕН СО ФЕКАЛИИ

    120 ЛИЦА ОД ГЕВГЕЛИСКО ЗАРАЗЕНИ СО ЕШЕРИХИЈА КОЛИ ОТИ ВОДОВОДОТ БИЛ ЗАГАДЕН СО ФЕКАЛИИ

    Со ешерихија коли, бактерија од фекално потекло, се заразиле жителите од три гевгелиски села, бидејќи водата за пиење од водоводот била контаминирана. 120 луѓе, жители на селата Стојаково, Селемлија и Богородица, викендов побарале медицинска помош поради болки во стомакот. Девет од нив биле хоспитализирани, а двајца се уште се во болница. Во овие три села живеат околу три илјади граѓани.

    Водата од водоводниот систем во овие три села е забранета за пиење, а здравствените власти не знаат дали по дефектот на водоводната мрежа ЈКП „Комуналец“ од Гевгелија извршил задолжително хиперхлорирање на водата.

    „Од 120 лица кои тогаш побарале лекарска помош, а гравитираат кон овие три села, 38 биле препратени во Гевгелиската Болница со средно и тешка симптоматологија , девет биле задржани, а две лица се уште се хоспитализирани. Тие се жалале гадење интензивно повраќање, болки во стомакот, течни столици со интензитетот во првите часови од 5-6 столици и опасност од дехидрација“, вели д-р Сашко Олумчев, епидемиолог и раководител на подрачна единица на Центарот за јавно здравје Велес-Гевгелија.

    Центарот за Јавно здравје Велес утврдил дека жителите од трите села се заразиле од водата во заедничкиот водовод, по што веднаш е наложено да се хиперхлорирање на водата за пиење.

    „Констатиравме дека на 25-ти август дошло до дефект на главниот цевковод кој ги снабдува овие три села од пумпната станица ‘Вардар’. Земени се мостри пред и по него, како и мостри од пациенти на преглед во Итната медицинска помош. Истражувањата покажаа дека во водата во Стојаково и во Селемлија нема резидуален хлор, а во водата во село Богородица имало хлор. Утврдено е присуство на колиформни бактерии со висок титар, односно присуство на бактерија од фекално потекло-ешерихија коли“, рече д-р Тони Димитриев в.д. директор на Центарот за јавно здравје Велес .

    Високи количини од бактеријата ешерихија коли во водата за пиење во Стојаково е утврдено и во испитувањата што Центарот за јавно здравје Велес ги направил и по четири дена. Во водата за пиење во другите две села при повторените анализи не се најдени бактерии. Во тек се анализите од мострите на водата за пиење земени вчера, а за да се даде дозвола луѓето да ја употребуваат треба два пати по ред резултатите ад бидат негативни

    „Водата од водоводот во овие три села и натаму не се препорачува за пиење. Треба да се пие флаширана или ако се дистрибуираа од цистерни“, вели д-р Анастасија Иванова, микробиолог од Центарот за јавно здравје Велес.

    П. ПЕЧКОВ

     

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари