Барокната фасада на владината зграда три години стои распадната, со паднати парчиња стиропор. На објектот, за кој беа потрошени 17 милиони евра, се гладаат парчиња железо и дупки.

Власта на СДСМ, во чиј мандат почнаа да паѓаат парчиња од фасадата, не спроведе постапка за реконструкција на распаднатите делови. Новата Влада предводена од ВМРО-ДПМНЕ, пак, вели дека ги разгледува сите објекти на кои им треба реконструкција и во наредниот период ќе се санираат, а ќе се изградат и недовршените.

„Владата посветува особено внимание на објектите, особено во делот на одржување и нивно инфраструктурно унапредување. Во моментов се прави анализа на состојбата. По утврдување и изнаоѓање на соодветно решение, ќе ја информираме јавноста“, ни одговорија од Владата.

Фасадата беше реновирана во 2013 кога премиер беше Никола Груевски, во рамките на проектот „Скопје 2014“. Изгледот на оригиналната владина зграда, кој беше еден од најдобрите примери на македонската модерна архитектура, се смени без согласност на авторот Петар Муличкоски. Зградата е изградена во 1970 година.

А. АНТЕВСКА