Околу осумдесет книги донираше Народната и универзитетска библиотека „Св. Климент Охридски“ за битолскиот затвор „Црн мост“ за затворениците да имаат поразновидна литература за читање. Меѓу насловите се дела од Димо Хаџи Димов, книги за историјата на македонскиот народ, „Желеец“ од Спиро Мавровски, посветена на патешествијата на Егејските Македонци, како и други романи и книги.

Директорката на Битолската библиотеката, Јелена Петровска, рече дека внимателно биле избрани насловите и дека со библиотерапијата може да се придонесе за ресоцијализација на осудените. Таа најави дека е можно во иднина да организираат и предавања и средби со писатели во затворот.

„Имаме скромна библиотека, но ги исполнува барањата на осудените лица. Сепак, бараат да се набават нови книги, кои излегуваат во светски рамки, но ние сме кратки во нашите можности. Но, преку ваква соработка, ќе одговориме на нивните потреби за книги“, рече директорот на затворот, Драган Крајовски.

Ж. ЗДРАВКОВСКА