60- годишниот Вецко Костадиновски од Битола е работникот кој рано утрово загина во рудникот Суводол во РЕК „Битола“. Од Комбинатот на прес-конференција соопштија дека станува збор за искусен работник кој починал во несреќен случај кога булдожерот со кој формирал траса за поместување на дел од нултиот систем влетал во провалија и се превртел.

Од менаџментот на ЕСМ и РЕК, кој утрово беше во комбинатот на итен состанок за точно да се увидат околностите, велат дека биле запазени сите протоколи за заштита при работа, а булдожерот бил технички исправен.

„Во РЕК работникот работеше од 2012 година, унапреден две скалила во 2018 година и награден пред само 2 месеца за својот труд. Машината што ја раководеше е ТД 40 булдожер, беше искусен ракувач и досега никогаш немаше проблеми. Машината е во исправна техничка состојба и последниот генерален ремонт на машината е извршен во март годинава. И никој од ракувачите немаше ставено забелешка на исправноста на машината“, рече Златко Ќурчиевски, директор на РЕК „Битола“.

Тој напомена дека работните задачи на починатиот Костадиновски биле поврзани со јаловинскиот систем, а не со јагленовиот, што значи апсолутно не се работело за санирање на состојбите од последните поплави.

Несреќата се случила рано утрово по 2 часот во рудникот Суводол, каде денес увид извршија истражни органи, а и од Комбинатот ќе формираат комисија да го испита случајот. Телото е дадено на обдукција.

„Работникот бил сам додека извршувал работна задача, немало други присутни, бил во движење и тоа ни ги отежнува можностите да кажеме кои се причините за настанатата несреќа. Од првичните информации, станува збор за несреќен случај и запазени се сите пророколи за заштита од работа. Но, ќе формираме и комисија која ќе го истражи овој настан“, рече Васко Ковачевски, директор на ЕСМ .

Раководството изрази сочуство до семејството, на кое ќе им пружат и помош, а изразија и длабоко жалење за загубата на искусниот работник.

Од 2003 досега, во РЕК имало пет несреќи со загуба на човечки живот.

Ж. ЗДРАВКОВСКА