Во неделата навечер целосно е демолирана наплатната рампа на затворениот паркинг Лирија, кој се наоѓа спроти Судот во Тетово. Металната куќарка е искршена и откорната е целата електроника од рампата со што е причинета голема материјална штета.
Од ЈП „Градски паркинг“ Тетово велат дека случајот е пријавен во полиција.
„Апелираме граѓаните да се воздржуваат од вакви несакани вандализми. Урбаната опрема треба сите да ја чуваме, градот припаѓа на сите подеднакво. Ова не е добра слика на нашето Тетово“, велат од ЈП „Градски паркинг“ Тетово.
Од претпријатието велат дека секојдневно се соочуваат со тешкотии во работењето и често пати се на удар на несовесните возачи. Само во изминатава недела насилно биле симнати 7 блокатори на тркалата кои биле поставени на возилата кои подолго време биле паркирани, а не платиле за паркинг. Неодамна двајца вработени од пајак службата биле физички нападнати додека подигале непрописно паркирано возило. Тие се здобиле со полесни телесни повреди, а против напаѓачот е поднесена пријава во СВР Тетово.
З. АНДОНОВ
