Девет ученици во училиштата во Општина Велес се позитивни на ковид-19, тројца од основното образование и шест од средното. Позитивни се и двајца директори, еден од основно и еден од средно, еден наставник, еден педагог и еден психолог од основно училиште и една хигеничарка во градинките, рече денеска на прес-конференција градоначалникот на Велес Аце Коцевски.

„Осум ученици од основните училишта се во изолација и две паралелки од гимназијата. Во изолација се учениците кои што не се вакцинирани. Ако се земе во обѕир вкупниот број на ученици, оваа бројка не влијае на одвивањето на наставата“, кажа Коцевски.

Тој потенцираше дека ова е состојбата во Велешко заклучно со денес претпладне и се однесува од почетокот на наставата за оваа учебна година.

Министерот за здравство Венко Филипче утрово кажа дека бројките досега покажуваат оти е навистина мал бројот на ученици кои се заболени.

П. ПЕЧКОВ