„ГЛАСНО ЗА МС“ – МАРШ НИЗ ШИРОК СОКАК ПРОТИВ ПРЕДРАСУДИТЕ ЗА МУЛТИПНА СКЛЕРОЗА

    „ГЛАСНО ЗА МС“ – МАРШ НИЗ ШИРОК СОКАК ПРОТИВ ПРЕДРАСУДИТЕ ЗА МУЛТИПНА СКЛЕРОЗАНа Светскиот ден за борба против мултиплекс склероза се одржа марш низ Широк Сокак наречен „Гласно за МС“ со цел да ја подигнат свесноста кај другите луѓе за мултиплекс склерозата. (Фото: СДК.МК)

    Битолчанки кои боледуваат од мултипна склероза, како и нивни поддржувачи, денес го кренаа гласот против предрасудите што постојат за болеста. На Светскиот ден за борба против неа тие одржаа марш низ Широк Сокак наречен „Гласно за МС“ со цел да ја подигнат свесноста кај другите луѓе за мултиплекс склерозата.

    „Целта ни е да се подигни свеста посебно тука во Битола зашто голема е скептичноста околу оваа тема. Треба да се зборува гласно за мултиплекс склерозата, за да не се срамат луѓето дека страдаат од таа болест зашто не е ништо страмно. Посебно кај девојките, има стари сфаќања од страна на родители дека никогаш нема да се омажат ако кажат дека страдаат од мултипна склероза. Можеби порано се верувало дека со мулiтплекс склероза не можe да се роди, но сега медицината е далеку понапредна. И да, со мултиплекс склероза може да се роди, болеста не делува на плодот. И со дисциплина и доволно терапија може да се живее здрав и квалитетен живот“, рече младата битолчанка Сања Поповска, лице со МС, која е автор на романот „Девојката со портокалова марама“, посветен на предизвиците на една млада девојка која се соочува со болеста.

    Засега немаат точна бројка колку лица во Битола боледуваат, но Поповска вели дека откако ја објавила книгата со неа стапиле во контакт многу девојки.

    „Мене ми е дијагностицирана пред 2 години, се појавува и на млада возраст, последно што бев во контакт со девојче од 15 години кое има мултиплекс“, рече Поповска.

    Настаните се под мотото „Гласно за МС“ во организација на храбрите битолчанки Анета Бошевска и Сања Поповска, како и Културниот центар „Везилка“, а потпомогнати и од други поддржувачи и Општина Битола траеја четири дена со интерактивни работилници со психолози, презентации на нутриционисти, изложби и друго. Маршот беше најава и за формирање на здружение на лица со мултиплекс склероза во Битола.

    „Со настаните укажавме дека овие лица не се сами, дека имаат поддршка, дека меѓусебно можат да си формираат нивна заедница која и понатаму ќе функционира и ќе си зацртаат цели заеднички да ги остварат. Треба сите гласно да зборуваат за болеста зашто болеста не ги претставува нив туку тие ја претставуваат неа. Ќе го шириме кругот за поддршка, во него имаме уметници, писатели и други битолчани со кои се обидуваме да ги зацврстиме вистинските вредности во животот“, рече Снежана Пресилска Танчевска од Културен центар „Везилка“.

    Ж. ЗДРАВКОВСКА

     

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира