Пералната која буквално се наоѓа среде булеварот Трета македонска бригада во Општина Аеродром, ќе се урива пролетва, најавуваат од Град Скопје.

Веќе трета година откако улицата беше проширена во булевар е пресечена со времен објект, автоперална. Ексградоначалникот Коце Трајановски при пуштањето на булеварот кажа дека за објектот имало постапка за експропријација и затоа не можеле да ја урнат пералната, па булеварот во еден дел наместо две има една коловозна лента.

Поради пресечениот булевар, ова место изминативе три години е црна точка во Скопје. Никаде на булеварот нема сообраќајни знаци за предупредување, па во овој дел се случија повеќе сообраќајни несреќи, дури и со жртви.

Градоначалникот Петре Шилегов вели дека овој проблемот кој го затекнал нерешен од неговиот претходник Трајановски конечно е отстранет, односно завршена е постапката за експропријација и наскоро ќе почне пробивањето на тој дел од булеварот.

„Судската одлука наредната недела ќе стане правосилна, по што ќе можеме уривање на пералната, а потоа и ќе го асфалтираме тој дел, со што оваа сообраќајница нема повеќе да биде пресечена и небезбедна каква што ја направи минатото раководство на Градот“, вели Шилегов.

А. АНТЕВСКА