Се сумираат последиците од невремето што синоќа го зафати регионот на Штип и Општина Карбинци, предизвикувајќи штети на околу 1.000 хектари лозови и овошни насади. Најмногу на удар биле насадите со вишна, чија берба штотука започна. Град имаше и во самиот Штип.

Како што информираат од подрачното одделение на Министерството за земјоделство во Штип, тие добиле известувања од земјоделците дека градот и поројниот дожд најмногу штета предизвикале во селата Караорман и Карбинци и во месностите Суитлак, Ајнато и Орта Колиба во околината на Штип.

Сопственици на насади со вишна, јаболко, орев и слива велат дека градот бил толку силен што плодовите од дрвјата ги послал на земја, не оставајќи ништо за берба.

„Нема да има берба и од лозовите насади, чие оштетување е од 50 до 70 проценти. Речиси да нема грозд кој беше во фаза на формирање зрно да не е погоден. Градот ја уништи и нивата со домати, пченка и бостан“, вели штипскиот земјоделец Ибо Алиов.

Т. ЈОВАНОВСКИ