Еднократна помош од 15.000 денари добија десетмина занаетчии како поддршка што ја негуваат традицијата и ги чуваат од изумирање старите занаети во Куманово. Помошта ја обезбедува Општина Куманово, а опфатени се сите регистрирани занаетчии во градот, меѓу кои се и кожари, крзнари, грнчари, чевлари и бакарорезци.

Претседателот на Регионалната занаетчиска комора, Агрон Фазлији, вели дека ова е пример како се поддржува традицијата во еден град.

„Вторпат во Куманово се даваат субвенции за старите занаети и многу сум среќен што нашиот град дава поттик и во други градови. Со ова даваме пример како треба да се одржуваат и негуваат културата, традицијата и старите занаети“, посочи Фазлији.

Во Куманово паралелно се одржува Саем на мало стопанство и стари занаети.

„Со претседателот на комората заклучивме дека од следната година треба да размислуваме и за финансиска поддршка за занаетчиските старт апи, како иницијатива за младите од средните училишта, по примерот на средно техничко и средно економско училиште, кои се претставени на овој саем со прекрасни ракотворби. Занаетчиството значи традиција, ние сме должни да ја негуваме традицијата“, изјави градоначалникоит Максим Димитриевски.

Занаетчиите сметаат дека секоја поддршка е добредојдена, но за да се сочуваат занаети, треба да се вложува многу повеќе.

„Јас се занимавам со оваа работа 38 години. Нашите занаети се во изумирање, јас сум единствениот бакарорезец во Куманово. Младите не сакаат макотрпна работа, тие секогаш го бираат полесниот начин. За да се направи едно дело се работи и по два и пол месеци“, вели Мирослав Поповски-Вински.

И оваа година, занаетчиите повторија дека на градот му фали сувенирница, а надлежните ветија дека ќе се отвори кога ќе се ослободи простор во Занаетчискиот дом во Куманово.

С. НИКОЛИЌ