Велешани се лидери во крводарување во земјава и планот за 2018 го надминале за 243%. Тие собрале вкупно 4.519 крвни единици, додека планот предвидувал 1.861. Од тие кои дарувале крв, четвртина немале директна корист, 590 првпат се дарители и дури 442 ученици со наполнети 18 години дарувале крв.

„Територијата на Црвен крст на Велес не е најголема во земјава, ниту е најбогата и добро стоечка, но затоа има доволно големи луѓе кои даруваат крв во секоја пригода, не само кога е потребна. Иако транзицијата остави голем број луѓе без приход, како стечајци и невработени, тоа не ги спречи, покрај сите нивни маки, да даруваат крв. На нив и на сите други кои покажаа висок степен на хуманост, големо благодарам. Ова покажува дека сè уште има луѓе во вистинска смисла на зборот, хумани, човечни, не егоисти“, рече д-р Милчо Трајков, претседател на ОО на Црвен Крст на Велес.

Тој дополни дека освен велешани, територијата која ја покрива општинскиот Црвен крст ги опфаќа и дарителите од општините Чашка и Градско. На нив денеска, на централната манифестација на Републичкиот Црвен крст, која се одржа во Велес, признанието им го врачи министерот за здравство Венко Филипче.

П. ПЕЧКОВ