Лабораторијата за молекуларна микробиологија при Центарот за јавно здравје во Битола од денес започна со пробно тестирање за КОВИД-19. Во изминатите два месеца се изведуваа интензивни градежни активности и беше набавена специфична опрема, согласно стандардите на СЗО. Ова е прва лабораторија за КОВИД-19 надвор од Скопје, а ќе го опслужува Југозападниот Регион.

Според протоколите, следната недела стручна комисија назначена од Министерството за здравство ќе направи увид и проценка на исполнување на стандардите, по што ќе добие дозвола за воведување на методата во рутинска работа. Со тоа, лабораторијата станува дел од Националната мрежа на лаборатории кои тестираат КОВИД-19 и споделуваат податоци со Министерството за здравство, Институтот за јавно здравје и Мој термин.

„Во почетокот планираме да се изработуваат по 50 тестови дневно, капацитет кој сметаме дека ќе биде доволен за потребите на граѓаните од Битола и регионот. Со ова, Битола добива нова современа лабораторија каде граѓаните ќе можат да добијат квалитетна услуга, а резултатот да го добијат во најкраток можен временски период од тестирањето“, соопштија од Центарот.

За градежниот зафат Општина Битола донираше 600.000 денари (околу 10 илјади евра), а „Кромберг и Шуберт“ обезбедија опрема од 1,8 милиони денари (околу 30.000 евра).

Ж. ЗДРАВКОВСКА