ОД УТРЕ ПРООДЕН СКОПСКИОТ БУЛЕВАР ТРЕТА МАКЕДОНСКА БРИГАДА КОЈ 4 ГОДИНИ БЕШЕ ПРЕСЕЧЕН СО ПЕРАЛНА

    ОД УТРЕ ПРООДЕН СКОПСКИОТ БУЛЕВАР ТРЕТА МАКЕДОНСКА БРИГАДА КОЈ 4 ГОДИНИ БЕШЕ ПРЕСЕЧЕН СО ПЕРАЛНАЕкипи на „Улици и патишта“ по налог на Град Скопје го асфалтираат просторот и велат дека за неколку дена целиот потег ќе биде прооден без пречки и стеснување на булеварот.(Фото: СДК.МК)

    Град Скопје почна со асфалтирање на делот од булеварот Трета македонска бригада во Општина Аеродром, што беше пресечен со перална. Бидејќи пералната додека се градеше булеварот не беше урната поради судски спор, во тој дел сообраќајницата се стеснува, односно 4 години наместо по две се возеше по една коловозна лента.

    Град Скопје лани во септември конечно го доби спорот со сопственикот на пералната и во октомври таа беше урната. Но, и за пробивањето на овој дел се чекаше пола година. Наместо веднаш да се стави асфалт, тоа се прави дури денес. Екипи на ЈП „Улици и патишта“ по налог на Градот го асфалтираат просторот и велат дека од утре потег ќе биде прооден без пречки и стеснување на булеварот.

    „Чекавме времето малку да затопли за да може да асфалтираме. Денеска ќе ставиме два слоја асфалт, а за третиот слој треба температурите да се повисоки, па тоа ќе го правиме кон средината на март. Но, по булеварот од утре ќе може да се вози“, велат од ЈП „Улици и патишта“.

    Ексградоначалникот Коце Трајановски, при пуштањето на булеварот пред 4 години, кажа дека за објектот имало постапка за експропријација и затоа не можеле да ја урнат пералната, па булеварот во еден дел наместо две има една коловозна лента.

    Поради пресечениот булевар, ова место изминативе три години е црна точка во Скопје. Никаде на булеварот нема сообраќајни знаци за предупредување, па во овој дел се случија повеќе сообраќајни несреќи, дури и со жртви.

    А. АНТЕВСКА

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари