Приватна компанија дојде напомош и го исчисти патот од снежните наноси на Пелистер за хотелот „Молика“, по повеќечасовните обиди на „Македонија пат” и ЈП „Нискоградба”.

Директорот на хотелот „Молика”, Горан Исков, за САКАМДАКАЖАМ.МК потврди дека по негово барање, вчеравечер во чистењето на патот се вклучила приватна фирма, која го направила тоа без надомест и дека патот е прооден, но само за патување со зимски гуми.

Поради снежните врнежи, вчера целиот ден не беше прооден патот на Пелистер до „Молика”, па туристите во хотелот не можеа да се вратат дома, а ни да се направи смена на персоналот. Патот со часови се обидуваа да го исчистат „Македонија пат” и „Нискоградба”. Имаше наврнато снег над еден метар, а снегот продолжи да паѓа и во вечерните часови и утрово.

Непрооден беше и патот од другата страна на планината, за Ниже Поле, каде со часови останаа заглавени туристи и локално население, а населбата беше и без струја. Вчеравечер, од ЈП „Нискоградба” соопштија дека е прооден и патот за Ниже Поле.

Ж. ЗДРАВКОВСКА