Слаб интерес покажале ранливите категории велешани на повикот од Општината за работно ангажирање. Општина Велес, која го распиша јавниот повик, имаше потреба од 10 лица кои се приматели на гарантирана минимална помош и невработени за извршување јавни работи во времетраење од 10 месеци. Се јавиле седум, петмина биле ангажирани.

„Од вкупно седум поднесени барања, шест доставиле уредна документација и ги исполниле условите пропишани на јавниот повик, а еден барател нема доставено потврда со која се потврдува дека лицето е корисник на социјална помош или невработено лице. Еден ден подоцна, кандидат кој ги имаше исполнето условите од лични причини поднесе барање за повлекување и поради тоа договор за работно ангажирање е склучен со пет лица. Истите започнаа со работа на 3 март со работни задачи на различни локации на територија на Општина Велес“, велат од Општина Велес.

Месечниот надоместок за работно ангажираните лица изнесува 20.000 денари со вклучен персонален данок. Ангажираните лица работат на јавни работи, чистење на улици, локални патишта, патеки, скали, чистење на водотранспортни објекти, отстранување на наноси и одрони, фарбање на комунална опрема, чистење на јавни објекти, поставување на опрема, собирање на отпад, чистење на депонии, подигање и одржување на зелени површини и други слични работи по потреба.

П. ПЕЧКОВ