Централните градски улици во Штип во последните десетина години континуирано се прошируваат со изградба на конзоли над коритото на реката Отиња. Проширувањето е со неколку метри при што се добиваат побезбедни тротоари, а се овозможува побрза и подобра фрекфенција на возилата.

Од почетокот на оваа година почна изградбата на конзоли над коритото на Отиња од таканаречените Каменик Мост до Влашкиот Мост во должина од стотина метри. Новите конзоли ќе бидат наменети за тротоар каде пешаците ќе можат да минуваат побезбедно, а сегашниот тротоар ќе биде паркинг, со што улицата Маршал Тито ќе бие проширена за неколку метри. Посебно внимание е посветено да се задржи постојниот дрворед.

Градоначалникот на Штип, Иван Јорданов, вели дека потребата од нови паркинзи постојано се зголемува затоа што значително е зголемена и посетата на граѓани од другите градови во регионот. Во континуиран пораст е и бројот на возилата и на жителите.

„Затоа, во план е кога ќе заврши овој проект да започне изградбата на две паркинг платформи, исто така над коритото на реката Отиња, едната пред Влашкиот Мост, а другата кај Трговскиот центар и мостот кај Судот во Штип. Со двете платформи ќе се добијат над 100 нови паркинг места. Тогаш на овој потег ќе имаме вкупно три платформи, бидејќи една платформа веќе е изградена и е во функција неколку години“, вели Јорданов.

Според градоначалникот, двете платформи ќе чинат над 700.000 евра, а околу 70.000 евра ќе изнесуваат конзолите што сега се во изградба. Се предвидува над 130.000 евра да се потрошат и за конзолите што деновиве почнаа да се градат во клисурата на реката Брегалница во Штипско Ново Село и патот што води кон градските гробишта во Штип. Овие конзоли, всушност, ќе бидат патека за пешаците затоа што има голем број граѓани кои до гробиштата одат пеш и досега се движеа по патот. Оваа пешачка патека ќе се протега покрај патот за Радовиш и ќе води до гробиштата, училиштето „Искра“ и бањата Кежовица.

Т. ЈОВАНОВСКИ