На барање на Здружението на тестилните, кожарските и чевларските работници „Гласен текстилец“, Комисијата за култура при Советот на Општина Штип одлучи да го помогне подигнувањето на спомен обележјето „Магичен конец“, посветено на текстилните работници и нивните права.

По спомен обележјето „Игла“, кое се подигна пред две години во населбата 8 Ноември, каде што живеат голем број текстилни работници, „Магичен конец“ ќе се постави во спомен паркот Бриони (Кртеќе), каде што се наоѓаат и спомен обележјата на македонските бранители од 2001 и на други истакнати личности.

„Автор на спомен обележјето е вајарот Андреј Митевски од Скопје, а ќе чини 3.500 евра, средства што се обезбедени од шведската фондација која го носи името на поранешниот шведски премиер Улоф Палме. Со ова обележје сакаме да придонесеме властите и газдите уште повеќе да се заложат за редовни и добри плати и за остварување на сите права на текстилните работници“, велат претставници на „Гласен текстилец“.

Текстилната индустрија е економското обележје на Штип и е индустриска гранка која најмногу го полни општинскиот буџет. Спомен обележјето ќе се отвори на 16 октомври, кога во Штип ќе се одржи традиционалната манифестација „Текстилијада“.

Т. ЈОВАНОВСКИ